TF MbusiNess - шаблон joomla Продвижение

Tajuk

Pengelikun di UNIMAS diangkat manah agi nengah pegai raban Polis Bantuan

May 21 2017

NYAGA PENGELIKUN: Hatta (dimua, tengah) enggau Solhi (dimua, kanan) begambar bebala mayuh enggau 35 iku Polis Bantuan UNIMAS ke baru udah nerima aset kereban pengangkut, kemari.

 

KOTA SAMARAHAN: Universiti Malaysia Sarawak (UNIMAS) deka chakah ngangkat manah agi pengelantang enggau pengelikun nembiak sereta universiti nya nengah pengawa ngangkatka gelar pangku pengawa jaga pengelikun nyadi polis bantuan.

Mandal Chanselor UNIMAS, Prof Datuk Dr. Mohd Kadim Suadi madahka, UNIMAS udah sereta deka ngelatih semua jaga pengelikun universiti nya nyadi polis bantuan.

Diatu kampus dijaga kaban Polis Bantuan UNIMAS ti neritka undang-undang nengah atur ti lebih efisyen.

“Unit Pengelikun UNIMAS benung dalam proses ngelatih semua jaga pengelikun nyadi polis bantuan.

“Pangka ari pekara tu iya nya Unit Pengelikun UNIMAS deka dipangku semua polis bantuan lalu tu meri pengelebih ngagai pengawa nyaga pegelikun di kampus, laban kuasa ke diberi ngagai polis bantuan sebedau tu nadai ba jaga pengelikun.

“Kami (UNIMAS) nyengkaum kampus mit bisi 145 iku jaga pengelikun lalu ari penyampau nya 35 iku udah dilatih nyadi polis bantuan sereta perambu kami deka ngelatih semua 145 iku nya nyadi polis bantuan,” ku iya.

Kadim mansutka pekara nya lebuh dirandau pengarang berita pengudah Pengawa Nyuaka Kereban Pengangkut Polis Bantuan UNIMAS ke diatur ba Padang Kawad, DeTAR PUTRA, UNIMAS ditu, lemai kemari.

Kampus induk ke diatu pemesai urung 2,000 ekar kelimpah ari ti bisi kampus mit di Bau, Sibu, Mengeri Kuching enggau Serian, ku iya.

Nitihku iya, seraban 35 iku keterubah nya udah dilatih ba Pusat Latihan Polis dalam timpuh 10 minggu ti berengkah bulan Oktober ngagai Disember 2015, pengudah nerima surat chiri nyadi polis bantuan kena 18 Jun 2015.

“Kami nganjung raban kedua jaga pengelikun dilatih nyadi polis bantuan, bulan Julai ke deka datai tu,” ku iya.

Kelimpah ari nya lebuh ti ngenang pasal keresa kereban pengangkut polis bantuan ke diterima Unit Pengelikun UNIMAS lalu nya pekara ti manah ngagai piak universiti.

Ba pengerami nya lemai kemari, Chairman Kaunsil Direktor UNIMAS Datu Dr.

Hatta Solhi nyuaka 22 iti kunchi kereban pengangkut polis bantuan UNIMAS ti nyengkaum dua buah kerita Proton Preve, lima buah motosikal Kawasaki Ninja 250cc enggau 15 buah motosikal Yamaha Lagenda 115cc.

Sebedau tu UNIMAS bisi enam kerita enggau urung 10 buah motosikal lama ti udah dibuai sereta diganti enggau ke baru ti disuaka seharitu (kemari), ku iya.

“Nengah keresa ke disuaka seharitu (kemari) nya deka chakah agi mantu polis bantuan tauka Bahagian Keselamatan UNIMAS bejalaika tanggungpengawa nyaga pengelikun kampus ngambika universiti nyadi sebuah kampus ti likun enggau lantang.

“Taja pan dalam kampus nadai kes ke besai tang kami ngemeratka aspek nagang sereta meri penyedar ngagai peranak kampus ngambika seruran bejaga enggau besedia nyaga reta tengkira diri enggau kebukai,” ku iya.

Sama bisi ngulu pengerami nya kemari, Sapit Mandal Chanselor, pemesai engggau pengereja pengawa UNIMAS.

Read 374 times
Rate this item
(0 votes)

About The Author

Super User

Typi non habent claritatem insitam; est usus legentis in iis qui facit eorum claritatem. Investigationes demonstraverunt lectores legere me lius quod ii legunt saepius.

125 comments

Leave a comment

Make sure you enter all the required information, indicated by an asterisk (*). HTML code is not allowed.